agarche mujh ko be-tauq-o-rasan-basta nahin chhoḌa
kisi qaidi ko us ne is qadar sasta nahin chhoḌa
har ik se dusre ka rabt us ne toḌ Daala hai
kisi ka dil kisi ke dil se vabasta nahin chhoḌa
ḳhud apne ḳhvab chun aaya huun kuchh rangin dhokon men
kisi titli ki ḳhatir main ne guldasta nahin chhoḌa
sunen rudad-e-gham kis se ki ashob-e-tabahi ne
koi ik bhi gharana shahr men basta nahin chhoḌa
kahen kya haal qabron ka ki ab ke us ne basti men
janaze bhi guzarne ka koi rasta nahin chhoḌa
kahan par us ne mujh par taliyan bajti nahin chahen
kahan kis kis ko mere haal par hansta nahin chhoḌa
Leave a Reply