Nabeel Ahmad Nabeel
jalan ke ḳhauf se bahar nikal sako to chalo
bichhi hai dhuup hi raston men chal sako to chalo
yahi taqaza hai is baar bhi mohabbat ka
badan pe gard-e-safar ko jo mal sako to chalo
jala ke zillat-e-shab men hatheliyon pe charagh
hava ke ruḳh ko agarche badal sako to chalo
mila hai izn-e-masafat kaḌe andheron men
kisi charagh ki lau men jo Dhal sako to chalo
ḳhayal rakhna ajal aḳhiri paḌav nahin
azab-e-umr se bahar nikal sako to chalo
bahut hi TeḌha hai ai dost ishq ka rasta
baghair rah-numa ke sambhal sako to chalo
is ek shart pe gulshan men daḳhila hoga
kisi gulab ke sanche men Dhal sako to chalo
har ek gaam pe bikhri hai raakh sadiyon ki
‘nabil’ ban ke sharara jo jal sako to chalo
Leave a Reply