Aziz Hamid Madni
naqshe usi ke dil men hain ab tak khinche hue
vo daur-e-ishq tha ki baḌe ma.arke hue
itna to tha ki vo bhi musafir-navaz the
majnun ke saath the jo bagule lage hue
aa.i hai us se pichhle pahar guftugu ki yaad
vo ḳhalvat-e-visal vo parde chhuTe hue
kyuun ham-nafas chala hai tu un ke suragh men
jis ishq-e-be-gharaz ke nishan hain miTe hue
ye mai-kada hai is men koi qaht-e-mai nahin
chalte rahenge chand subu dam kiye hue
kal shab se kuchh ḳhayal mujhe but-kade ka hai
sunta huun ik charagh jala ratjage hue
meri vafa hai us ki udasi ka ek baab
muddat hui hai jis se mujhe ab mile hue
allah-re faiz-e-bada-parastan-e-pesh-rau
nikle zamin se shisha-e-mai kuchh dabe hue
main bhi to ek sub.h ka taara huun tez-rau
ap-apni raushni men akele chale hue
Leave a Reply