Jab Talak Aab-O-Dana Lagta Hai

jab talak āb-o-dāna lagtā hai

ye jahāñ āshiyāna lagtā hai

ġhuncha ġhuncha khilā hai phūloñ sā

aap kā muskurānā lagtā hai

merī maañ kā diyā huā rūmāl

dhuup meñ shāmiyāna lagtā hai

aaj lambe safar pe chalte haiñ

aaj mausam suhānā lagtā hai

aise bachchoñ ko kaun samjhā.e

ghar jinheñ qaid-ḳhāna lagtā hai

aap kā dard dard hai lekin

dūsroñ kā bahāna lagtā hai

tū vafādār hai to phir ‘ulfat’

kyuuñ burā āzmānā lagtā hai

Leave a Comment