su-e-manzil na jo ravan honge
surat-e-gard-e-karvan honge
lab agar ḳhugare-fughan honge
dagh-e-dil aur bhi ayaan honge
do-ghaḌi hans ke baat kar ham se
phir ḳhuda jaane ham kahan honge
gulsitan men bahar aane de
Dali-Dali pe ashiyan honge
aah vo fasle jo qurb pe bhi
mere aur un ke darmiyan honge
husn jab tak na jalva-gar hoga
donon aalam dhuan-dhuan honge
chhiḌ gaya phir tire shabab ka zikr
dil ke arman phir javan honge
aap kahte hain hain to yaqin hai mujhe
aap bhi mere qadr-dan honge
ham na honge magar hamare ba.ad
ashk is aankh se ravan honge
vaj.h-e-barbadi-e-dil-e-‘rif.at’
aap jaise hi qadr-dan honge
Leave a Reply