jo sahifon men likhi hai vo qayamat ho jaae
gar mohabbat dil-e-insan se bhi rukhsat ho jaae
tu zaminon pe utar kar jo guzare ik din
asmanon ke khuda tujh ko bhi hairat ho jaae
kahin aisa na ho ki tanha yunhi rahte rahte
rafta rafta mujhe tanhai ki aadat ho jaae
kuchh bashar aise bhi hote hain ki jin se mil kar
devtaon ki tarah un se aqidat ho jaae
bad-dua us ne mujhe di hai ki ‘ruhi’ tujh ko
apne jaise kisi zalim se mohabbat ho jaae