Rasheed Qaisrani
ye kaun sa suraj mire pahlu men khaḌa hai
mujh se to ‘rashid’ ab mira saaya bhi baḌa hai
tu jis pe ḳhafa hai mire andar ka ye insan
us baat pe mujh se bhi ka.i baar laḌa hai
dekha jo palaT kar to mire saa.e men gum tha
vo shaḳhs jo mujh se qad-o-qamat men baḌa hai
sadiyon use paala hai samundar ne sadaf men
pal-bhar ke liye jo miri palkon men jaḌa hai
ḳhurshid ke chehre pe lakiren hain lahu ki
ḳhanjar sa koi raat ke siine men gaḌa hai
ik lafz jo nikla tha safen dil ki ulaT kar
muddat se mire lab pe vo be-jan paḌa hai
Takra ke palaTta huun lagatar udhar se
ye sang-sifat kaun sar-e-rah khaḌa hai
Leave a Reply