Bahana

suno

tum kyuun nahin kahte

mire aansu tumhen taklif dete hain

mire dukh sun ke tum bhi bebasi mahsus karte ho

meri avaz ki larzish tumhen bhi khuun rulati hai

mere lahje ki namnaki tumhen bechain rakhti hai

mujhe maalum hai lekin ye sab tum kah nahin sakte

usi lamhe tumhen yaad aane lagte hain

kai behad zaruri kaam aur phir tum

achanak munqataa karte ho telephone ki line

phir ek massage men likhte ho

mujhe afsos hai package achanak khatm hone par

to phir kal baat karte hain

magar main janti huun is bahane ko

mujhe maalum hai janan

mire aansu tumhen taklif dete hain

Leave a Comment