kafiri men bhi jo chahat hogi
kuchh to iman ki shabahat hogi
hashr hai vada-e-farda tera
aaj ki raat qayamat hogi
puchha phir hogi mulaqat kabhi
phir mire haal pe shafqat hogi
kis safa.i se diya us ne javab
dekha ja.ega jo fursat hogi
ḳhak-asuda gharibon ko na chheḌ
ek karvaT men qayamat hogi
aap ke paanv ke niche dil hai
ik zara aap ko zahmat hogi
har nafas utni hi lau dega ‘siraj’
jitni jis dil men hararat hogi
Leave a Reply