aql gai hai sab ki khoi kya ye khalq divani hai
aap halal main hota huun in logon ko qurbani hai
nutq-e-zaban gar hota mujh ko puchhta main taqsir miri
haan ye magar do ankhen hain so in se ashk-fishani hai
ghaas chari hai jangal ki main juun men dumbe bakre ki
un ka kuchh Dhala ki bigada jis par khanjar raani hai
tiin jagah se mere gale ko misl-e-shutur ye katte hain
din-e-mohammadi hai jo khalili us ki ye tughyani hai
jins ne jins ko qatl kiya kab dekhiyo bad-zati to zara
yaani jo ho mard-e-musalman us ki ye hi nishani hai
kafir dil jallad nahin ham zakhm ko ek samajhte hain
ham ko jo is kaam ka samjhe us ki ye nadani hai
rah-e-raza par apna gala katvae jo niche khanjar ke
‘mushafi’ us ko ham ye kahenge vo bhi husain-e-sani hai