Mai-Kasho Jam uTha Lo Ki ghaTaen Aain

Josh Malsiani

mai-kasho jaam uTha lo ki ghaTa.en aa.iin

ishrabu kahti hui sard hava.en aa.iin

ishq o ulfat ki saza mil ga.i aḳhir mujh ko

mere aage miri ma.asum ḳhata.en aa.iin

ab tavajjoh to mire haal pe ho jaati hai

shukr karta huun ki is but ko jafa.en aa.iin

ḳhanda-zan dagh-e-ma.asi pe hui jaati hai

lo miri sharm-e-gunah ko bhi ada.en aa.iin

vahi marne ki tamanna vahi jiine ki havas

na jafa.en tumhen aa.iin na vafa.en aa.iin

phir vo amada hue mujh pe barasne ke liye

phir mire sar pe musibat ki ghaTa.en aa.iin

is qadar jaur-e-hasinan se raha ḳhauf-zada

huren aa.iin to main samjha ki bala.en aa.iin

koh-e-gham tha mira in.am-e-mohabbat shayad

chaar janib se uThalo ki sada.en aa.iin

Dubne vaali hai kya kashti-e-ummid ai ‘josh’

mauj taḌpi lab-e-sahil pe dua.en aa.iin