mire liye tira hona aham ziyada hai
ye baaqi zikr-e-vajud-o-adam ziyada hai
vo khali-pan hai kahin kuchh kashish nahin hai mujhe
koi khushi hai bahut aur na gham ziyada hai
tire baghair zarurat hi kiya padi hai mujhe
tire baghair ye dam hai so dam ziyada hai
ye meri aankh hai yaan khvab kaise thahrenge
ki sim-khurda zamin hai jo nam ziyada hai
mira ye dil ki jise koi pech-o-tab nahin
tiri ye zulf jise pech-o-kham ziyada hai
tu khuub janta hai yar-e-be-niyaz ki ab
junun bahut hai mujhe phir bhi kam ziyada hai
Leave a Reply