Dinesh Kumar Drouna
saans ka jhonka bhi ab tufan hota ja.ega
har nafas thoḌa bahut nuqsan hota ja.ega
chaap kanon se kisi ki duur jaati ja.egi
rafta rafta ye badan be-jan hota ja.ega
ajnabi logon ki dil par dhaak baḌhti ja.egi
apne hi ghar men koi mehman hota ja.ega
pasbanon ke havale bastiyan hongi agar
jagne ka raat bhar elaan hota ja.ega
hijr ka aalam uḌa le ja.ega rangat kahin
aur samundar suukh kar maidan hota ja.ega
raat hone do yahan par barhana.i chha.egi
vo havas men dekhna haivan hota ja.ega
Leave a Reply