Pinhaan
rasile ḳhvab saare kho chuki huun
bahut rukhi haqiqat ho chuki huun
jaga.e koi suraj sub.h-e-nau ka
purani raat sadiyon so chuki huun
ghamon ko hans ke sahna aa gaya hai
main apni har ḳhushi ko ro chuki huun
main apne dil ki banjar sar-zamin men
ḳhushi ke biij kitne bo chuki huun
bahut maili thi chadar zindagi ki
use ashkon se apne dho chuki huun
chala hai saath tanha.i ka jangal
tire hamrah jab se ho chuki huun
amanat ye bhi lauTa.i hai us ko
badan ka bojh barson Dho chuki huun
raha kahne ko ab kya aur ‘pinhan’
ghazal se haal sab to kah chuki huun
Leave a Reply