dida-e-sarf-e-intizar hai sham.a
meri halat ki yadgar hai sham.a
nahin dil men kisi ke soz-o-gudaz
ki tamasha-e-rozgar hai sham.a
pa.e-jumbish sada taḌapti hai
tapish-e-na-tavan shikar hai sham.a
ruḳh-e-raushan hai nur-e-bina.i
chashm-e-ushshaq ka ghubar hai sham.a
roz-e-tira men bad-numa ḳhurshid
shab-e-raushan men tira-kar hai sham.a
yad-e-gul-e-ruḳh se phuul jhaḌte hain
kis bashashat se nau-bahar hai sham.a
ḳhaak nasur-e-dil bhare is ka
zaḳhmi-e-girya-ha-e-zar hai sham.a
husn divana sab ko karta hai
apne hi aap par nisar hai sham.a
sub.h hote hi TimTimati hai
aap ki chashm-e-pur-ḳhumar hai sham.a
kyuun na ro.e na kis tarah se jale
ki fughani-e-raz-dar hai sham.a
nahin bujhti lagi hui ji ki
shola-e-jan-e-sogvar hai sham.a
hai idhar dagh-e-barq-e-parvana
aur udhar chashm-e-abr-bar hai sham.a
husn bhi hai ma.al-e-kar vabal
bazm-dar-bazm kya hai ḳhaar hai sham.a
jhankna parde se buri ḳhu hai
ḳhud-ba-ḳhud aap sharmsar hai sham.a
shab-e-tanha.i aur tu aur ye
ai ‘qalaq’ teri gham-gusar hai sham.a
Leave a Reply