kaho to naam main de duun ise mohabbat ka
jo ik alaav hai jalti hui rifaqat ka
jise bhi dekho chala ja raha hai tezi se
agarche kaam yahan kuchh nahin hai ujlat ka
dikhai deta hai jo kuchh kahin vo khvab na ho
jo sun rahi huun vo dhoka na ho samaat ka
yaqin karne lage log rut badalti hai
magar ye sach bhi karishma na ho khitabat ka
sanvarti rahi ghar ko magar ye bhuul gai
ki mukhtasar hai ye arsa yahan sukunat ka
chalo ki is men bhi ik-adh kaam kar dalen
jo mil gaya hai ye lamha zara si mohlat ka
Leave a Reply