gham ke tufan dil-e-muztar men Thahar jaate hain
aish ke lamhe to pal bhar men guzar jaate hain
haif-sad-haif ki na-qadri-e-fan ke hathon
kitne fankar lahu thuuk ke mar jaate hain
vo pahunch sakte nahin bam-e-taraqqi pe kabhi
vaqt ke ziine se jo log utar jaate hain
ahl-e-danish pe uThata nahin ungli koi
jitne ilzam hain divanon ke sar jaate hain
azm-o-himmat ko bana lete hain jo rah-numa
saḳht rahon se bhi hans hans ke guzar jaate hain
apne ehsas ke jalte hue virane men
ḳhushk patton ki tarah log bikhar jaate hain
jab shab-e-gham men mujhe tera ḳhayal aata hai
meri tanha.i ke lamhat sanvar jaate hain
tohfa-e-mahr-o-vafa kaun yahan deta hai
dil ka kashkol liye aap kidhar jaate hain
kis tarah vaqt ki Thokar vo karenge bardasht
dil dhaḌakne ki sada sun ke jo Dar jaate hain
un ke saa.e se bhi tum duur raho ai ‘ma.asum’
apne va.ade se jo ahbab mukar jaate hain
Leave a Reply