Farooq Muztar
shafaq-e-shab se ubharta hua suraj sochen
barf ki tah se koi chashma ubalta dekhen
raushni dhuup hava mil ke kiya sab ne niDhal
ab tamanna hai kisi andhe kuen men bhaTken
jalte-bujhte hue is shahr pe kya kuchh likkha
aaj sab likkha hua aankh pe la kar rakh den
jaane kyuun Dubta rahta huun main apne andar
jaane kyuun sujhti rahti hain ye ulTi baten
chhin len apni muravvat ka ye ziina gar ham
aaj ‘muztar’ use akash se girta dekhen
Leave a Reply