Bagule Rahnuma Hain Baad-E-Sahrai Safar Mein Hai

Poet

bagule rahnuma hain bad-e-sahra.i safar men hai

ruken kaise hamare saath rusva.i safar men hai

ḳhabar bhi to nahin hai ab kidhar ko ja rahe hain ham

sarabon ka safar hai abla-pa.i safar men hai

ye basti hai ki zindan kuchh bhi to palle nahin paḌta

the kab pachhua ke din aur kab se purva.i safar men hai

kahan se aa.iin kanon ke liye rim-jhim si avazen

jaras ik lafz-e-parina hai shahna.i safar men hai

azal se ta-abad hai kar-farma gardish-e-dauran

ki nadani hazar men aur dana.i safar men hai

use sadiyan lagengi niind se bedar hone men

abhi aghaz ka mausam hai angḌa.i safar men hai

koi aahaT banati hi nahin ummid ka mausam

kuchh aisi chup lagi hai jaise goya.i safar men hai

akele-pan ka ‘azmi’ ho bhi to ehsas kaise ho

tasalsul se hamari sham-e-tanha.i safar men hai