ruuh gar nauha-kunan ho to ghazal hoti hai
dil ko ehsas-e-ziyan ho to ghazal hoti hai
mahfil-e-mah-vashan men to ghazal ho na saki
bazm-e-ashufta-saran ho to ghazal hoti hai
sirf ankhon men nami se na banegi koi baat
ek dariya sa ravan ho to ghazal hoti hai
main ne mahsus kiya hai ki kisi ki vo nazar
meri janib nigaran ho to ghazal hoti hai
dhime dhime se sulagte hue jazbat ke saath
‘mir’ ka tarz-e-bayan ho to ghazal hoti hai
Leave a Reply