Yun Bhi Ras Aai Nahin Uski Wafa Tum Rakh Lo

yuun bhi raas aai nahin us ki vafa tum rakh lo

mujh ko bimar hi rahne do dava tum rakh lo

band kamron ki ghuTan mere liye rahne do

ye jo aati hai darichon se hava tum rakh lo

meri rahon men bichha do tum andhere saare

aur ye lo mire hisse ka diya tum rakh lo

oḌh kar baiTh gai huun main dukhon ki chadar

ye ḳhushi aur ye ḳhushbu-e-qaba tum rakh lo

mujh ko ye nur-e-qamar tirgi se hasil hai

mere andar se jo nikli hai ziya tum rakh lo

paas baiThe koi dil khol ke do baat kare

baaqi duniya ke ye atvar-o-ada tum rakh lo

meri maan to miri jannat ko liye baiThi hai

aisa kar lo mire purkhon ki dua tum rakh lo

main gunahgar hi achchhi huun bara-e-mahfil

ye jo tum bechte phirte ho ḳhuda tum rakh lo

Leave a Comment