Dilawar Ali Aazar
khinch kar aks fasane se alag ho jaao
be-numu a.ina-ḳhane se alag ho jaao
saara din saath raho saa.e ki surat apne
shaam hote hi bahane se alag ho jaao
sher vo likkho jo pahle kahin maujud na ho
ḳhvab dekho to zamane se alag ho jaao
sha.iri aise jhamelon se bahut aage hai
is na.e aur purane se alag ho jaao
niind men hazrat-e-yusuf ko agar dekha hai
ain mumkin hai gharane se alag ho jaao
ehtiraman mire halqe men rahe ho shamil
ehtimaman mire shane se alag ho jaao
us ko tasvir karo saf.ha-e-dil par ‘azar’
ghaib ka naqsh banane se alag ho jaao
Leave a Reply