Raat Bhi Humne Ro-Ro kaTi Din Bhi so Ke KHarab Kiya

raat bhi ham ne ro-ro kaaTi din bhi so ke ḳharab kiya

khulne vaali ankhon ko bhi amdan mahv-e-ḳhvab kiya

ek hi roTi ko dho dho kar piite rahe ham sham-o-sahar

saari umr men shayad ham ne ek hi kar-e-savab kiya

rizq to hai maqsum hamara us ko dua ki hajat kyuun

Dhank ke chehra dast-e-dua se ham ne ḳhud se ḳhitab kiya

us ki nazar se tiir jo nikla Thiik nishane par baiTha

ghayal aahu ban kar ham ne ban ban ko shadab kiya

ashk baha dene ke hunar men saani us ka koi nahin

ik din hanste hanste us ne sab ko tah-e-sailab kiya

bachpan men dekha tha ham ne maan ka chehra yaad nahin

bu-ali-sina ban kar ham ne us ke ruḳh ko kitab kiya