Jism Ke Martaban Se Aage

Khursheed Akbar

jism ke martaban se aage

za.iqe se zaban se aage

tiir saare kaman se aage

ik ḳhalish aur jaan se aage

ik parinda lahu men tar goya

ik tasavvur uḌaan se aage

ek basti yaqin-faroshon ki

ik ilaqa guman se aage

ek fariyad na-rasa.i ki

ik zamin asman se aage

ik safar aur hai tah-e-girdab

ik junun badban se aage

ek ‘ḳhurshid’ ki shahadat par

shahr-e-zulmat bayan se aage