zara si der ko aata hai lauT jaata hai
milan ki aas jagata hai lauT jaata hai
mariz-e-ishq ko de kar vo pyaar ka nusḳha
ḳhalish ko aur baḌhata hai lauT jaata hai
vo ek baar bhi sunta nahin miri arzi
bas apni baat sunata hai lauT jaata hai
jhagaḌ ke niind men aksar vo be-sabab mujh ko
darun-e-ḳhvab rulata hai lauT jaata hai
vo ishq ban ke utarta hai mere angan men
vafa ke diip jalata hai lauT jaata hai
dam-e-firaq vo leta hai pyaar ki qasmen
sunahre ḳhvab dikhata hai lauT jaata hai
‘zaki’ ye kaun hai jo roz meri turbat par
yuun aa ke ashk bahata hai lauT jaata hai
Leave a Reply