Jameeluddin Aali
ek ajiib raag hai ek ajiib guftugu
saat suron ki aag hai aThvin sur ki justuju
bujhte hue mire ḳhayal jin men hazar-ha saval
phir se bhaḌak ke ruuh men phail ga.e hain char-su
tira-shabi pe sabr tha so vo kisi ko bha gaya
aap hi aap chha gaya ek sahab-e-rang-o-bu
hansti hui ga.i hai sub.h pyaar se aa rahi hai shaam
teri shabih ban ga.i vaqt ki gard hu-ba-hu
phir ye tamam silsila kya hai kidhar ko ja.ega
meri talash dar-ba-dar tera gurez ku-ba-ku
ḳhun-e-junun to jal gaya shauq kidhar nikal gaya
sust hain dil ki dhaḌkanen tez hai nabz-e-arzu
tera mira qusur kya ye to hai jabr-e-irtiqa
bas vo jo rabt ho gaya aap hi pa gaya numu
main jo raha huun be-suḳhan ye bhi hai ehtiram-e-fan
yaani mujhe aziiz thi apni ghazal ki aabru
Leave a Reply