bahar hai tire aariz se lau laga.e hue
charagh lala-o-gul ke hain jhilmila.e hue
tira ḳhayal bhi teri hi tarah aata hai
hazar chashmak-e-barq-o-sharar chhupa.e hue
lahu ko pighli hui aag kya bana.enge
jo naghme aanch men dil ki nahin tapa.e hue
zara chale chalo dam bhar ko din bahut biite
bahar-e-sub.h-e-chaman ko dulhan bana.e hue
qadim se hai yahi rasm-o-rah-e-mulk-e-vafa
ki azma.e ga.e jo the azma.e hue
DhiTa.i dekhi thi us se laḌate hain ankhen
sitare ankhon ki teri jhapak chura.e hue
hai ja-e-husn haya aur bhi izafa kar
nazar ke samne aa ja nazar jhuka.e hue
jo muntazir the kisi ke vo so ga.e aḳhir
sisakti arzuon ko gale laga.e hue
ab is ke baad gila kis se kijiye kis ka
samajhte the jinhen apna vahi para.e hue
ham apne hal-e-pareshan pe muskura.e the
zamana ho gaya yuun bhi to muskura.e hue
hamesha kaif se ḳhali rahenge vo naghme
jo teri nik.hat-e-ḳhush men nahin basa.e hue
‘asar’ sunati hain ab dil ki dhaḌkanen shab ko
fasane us nigah-e-mast ke suna.e hue
Leave a Reply