Hindostan

go khaak ho chuka hai hindostan hamara

phir bhi hai kul jahan men palla garan hamara

munh tak raha hai ab tak saara jahan hamara

hai naam kishvaron men vird-e-zaban hamara

zarkhez hai sarasar ye gulistan hamara

hai tair-e-tilai hindostan hamara

bharat men dekhte the ham sanaten jahan ki

mashhur thi jahan men karigari yahan ki

vo baat hindiyon ne ghairon ke darmiyan ki

jis par jhuki hai gardan amboh-e-sarkashan ki

milta tha ilm-o-fan men ham-sar kahan hamara

hai tair-e-talai hindostan hamara

taslim kar rahe hain espen aur japan

sab mante hain loha german france-o-yunan

america men hai charcha is mulk ka numayan

bharat ki saltanat par bartaniya hai nazan

uncha hai asman se ye astan hamara

hai tair-e-tilai hindostan hamara

parbat ki chotiyan hain darban hamare dar ki

daman men jis ke pinhan kanen hain sim-o-zar ki

gang-o-jaman pe jis dam sayyad ne nazar ki

sarsabz vadiyon se is ki nazar na sar ki

kya ghairat-e-iram hai ye bostan hamara

hai tair-e-tilai hindostan hamara

paida kiye the jis ne arjun kanad gautam

aghosh men pale the jis ki byas-o-bikram

godi men jis ki khele the bhiim raam bhisham

jin ke sabab se ab tak hai hindiyon men dam-kham

vo mulk-e-be-badal hai jannat-nishan hamara

hai tair-e-tilai hindostan hamara

Leave a Comment