Pinhaan
jan-e-man aap to bezar hue baiThe hain
kya masiha mire bimar hue baiThe hain
is ada par mira dil kya miri jaan bhi hazir
aap yuun khinch ke jo talvar hue baiThe hain
dushman-e-jan the to karte the ta.aqub lekin
jan-e-jan ho ke to be-kar hue baiThe hain
shaam ki chaa.e ka va.ada vo udhar bhuul ga.e
ham idhar sub.h se tayyar hue baiThe hain
hasil-e-ishq hai kya husn-e-nazar se aage
ḳhush-guman talib-e-didar hue baiThe hain
phir zamane ka hai israr chalo saath chalo
aur ham raah men divar hue baiThe hain
un ki nazron ka ishara hai nizam-e-hasti
apni qudrat ka jo shahkar hue baiThe hain
zindagi ḳhvab magar ḳhvab-e-haqiqat-nigaran
ham ye kis niind men bedar hue baiThe hain
dad-o-tahsin ki parva nahin ham ko ‘pinhan’
ham ghazal kah ke hi sarshar hue baiThe hain
Leave a Reply