ai husn-e-lala-fam! zara aankh to mila
ḳhali paḌe hain jaam! zara aankh to mila
kahte hain aankh aankh se milna hai bandagi
duniya ke chhoḌ kaam! zara aankh to mila
kya vo na aaj a.enge taron ke saath saath
tanha.iyon ki sham! zara aankh to mila
ye jaam ye subu ye tasavvur ki chandni
saaqi kahan mudam! zara aankh to mila
saaqi mujhe bhi chahiye ik jam-e-arzu
kitne lagenge daam! zara aankh to mila
pamal ho na jaa.e sitaron ki aabru
ai mere ḳhush-ḳhiram! zara aankh to mila
hain rah-e-kahkashan men azal se khaḌe hue
‘saghar’ tire ghulam! zara aankh to mila
Leave a Reply