hiqarat se na dekho dil ko jam-e-jam bhi kahte hain
isi ḳhak-e-tapan ko fatah-e-alam bhi kahte hain
ye dil ki dastan-e-muztarib hai jis ko duniya men
kahin aansu kahin moti kahin shabnam bhi kahte hain
kabhi ke ik tabassum ko saja rakkha hai honTon par
bahut se to use parvarda-e-matam bhi kahte hain
masarrat ke pujari tujh ko ye ishrat mubarak ho
ye duniya hai masarrat ko yahan par gham bhi kahte hain
zamana kah raha hai tum ne gulshan hi miTa Daala
muravvat bartaraf lo aaj aisa ham bhi kahte hain
Leave a Reply