Shahid Zaki
zar-e-sarishk faza men uchhalta hua main
bikhar chala huun ḳhushi ko sambhalta hua main
abhi to pahle paron ka bhi qarz hai mujh par
jhijak raha huun na.e par nikalta hua main
kisi jazira-e-pur-amn ki talash men huun
ḳhud apni raakh samundar men Dalta hua main
phalon ke saath kahin ghonsle na gir jaa.en
ḳhayal rakhta huun patthar uchhalta hua main
ye kis bulandi pe la kar khaḌa kiya hai mujhe
ki thak gaya huun tavazun sambhalta hua main
vo aag phaili to sab kuchh siyah raakh hua
ki so gaya tha badan ko ujalta hua main
bichhaḌ gaya huun ḳhud apne maqam se ‘shahid’
bhaTakne valon ko raste pe Dalta hua main
Leave a Reply