Tanweer Gauhar
dilon men bughz ke ḳhane na hote
to apne log begane na hote
vafa ko DhunDti phirti ye duniya
agar ham jaise divane na hote
na ham ko gham agar aata mayassar
to lutf-e-zindagi jaane na hote
kahan tha ham se rindon ka Thikana
agar basti men mai-ḳhane na hote
na luTte ham agar yaaro luTere
hamare jane-pahchane na hote
kahan ham bojh dil ka karte halka
jo rone ko tire shane na hote
zaban-e-hal par achchha tha ‘gauhar’
agar maazi ke afsane na hote
Leave a Reply