kab hava muTThi men aati hai abas dauḌa kiya
jaane kya kya kal yunhi main rat-bhar socha kiya
ab to is tark-e-ta.alluq men mujhe bhi lutf hai
jo kiya tum ne miri ḳhatir bahut achchha kiya
jaise vo bhi falsafe ke nukta-e-pechida hon
meri baten mere badle ghair se samjha kiya
phir mujhe daryaft karne ki use hasrat rahi
vo mujhe dimak lage auraq men DhunDha kiya
ḳhu men chahe tund ho dil se nihayat nek hai
bhuul kar sab pichhli baten mere paas aaya kiya
tishnagi mera muqaddar hai mujhe paani se kya
janta tha phir bhi ḳhema nahr par barpa kiya
kal vahi shab thi jo aati hai nasibon se magar
aur sab sote rahe bas ek main jaaga kiya
jab na.i avaz uTThi qatl karne aa.e log
ik madari saanp ka sar maan kar kuchla kiya
Leave a Reply