chand sitare qaid hain saare vaqt ke bandi-ḳhane men
lekin main azad huun saaqi chhoTe se paimane men
umr hai faani umr hai baaqi is ki kuchh parva hi nahin
tu ye kah de vaqt lagega kitna aane jaane men
tujh se duuri duuri kab thi paas aur duur to dhoka hain
farq nahin anmol ratan ko kho kar phir se paane men
do pal ki thi andhi javani na-dani ki bhar paaya
umr bhala kyuun biite saari ro ro kar pachhtane men
pahle tera divana tha ab hai apna divana
pagal-pan hai vaisa hi kuchh farq nahin divane men
ḳhushiyan aa.iin achchha aa.iin mujh ko kya ehsas nahin
sudh-budh saari bhuul gaya huun dukh ke giit sunane men
apni biiti kaise suna.en mad-masti ki baten hain
‘mira-ji’ ka jivan biita paas ke ik mai-ḳhane men
Leave a Reply