Poet
gham-e-hayat se jab vasta paḌa hoga
mujhe bhi aap ne dil se bhula diya hoga
suna hai aaj vo ghamgin the malul se the
koi ḳharab-e-vafa yaad aa gaya hoga
navazishen hon bahut ehtiyat se varna
miri tabahi se tum par bhi tabsira hoga
kisi ka aaj sahara liya to hai dil ne
magar vo dard bahut sabr-azma hoga
juda.i ishq ki taqdir hi sahi gham-ḳhvar
magar na jaane vahan un ka haal kya hoga
bas aa bhi jaao badal den hayat ki taqdir
hamare saath zamane ka faisla hoga
ḳhayal-e-qurbat-e-mahbub chhoḌ daman chhoḌ
ki mera farz miri raah dekhta hoga
bas ek nara-e-rindana ek jur.a-e-talḳh
phir us ke baad jo aalam bhi ho naya hoga
mujhi se shikva-e-gustaḳhi-e-nazar kyuun hai
tumhen to saara zamana hi dekhta hoga
‘asad’ ko tum nahin pahchante ta.ajjub hai
use to shahr ka har shaḳhs janta hoga
Leave a Reply