Nishant Shrivastava Nayab
zer-e-lab ham ne tishnagi kar li
ik samundar se dosti kar li
raah takte rahe havaon ki
phir charaghon ne ḳhud-kushi kar li
vaqt ki chaal dekhne ke liye
ham ne raftar men kami kar li
kaam koi na ho saka ham se
ham ne har fikr peshgi kar li
ham ne har gham chhupa liya us se
zabt us ne bhi har ḳhushi kar li
rat-bhar koste hain duniya ko
sub.h hote hi dosti kar li
Leave a Reply