Mere Qadmon Mein Duniya Ke KHazane Hain uTha Lun Kya

mire qadmoñ meñ duniyā ke ḳhazāne haiñ uThā luuñ kyā

zamāna gir chukā jitnā maiñ ḳhud ko bhī girā luuñ kyā

tirā chehra banāne kī jasārat kar rahā huuñ maiñ

lahū āñkhoñ se utrā hai to rañgoñ meñ milā luuñ kyā

sunā hai aaj bastī se musāfir ban ke guzroge

agar niklo idhar se to maiñ apnā ghar sajā luuñ kyā

bharā ho dil hasad se to nazar kuchh bhī nahīñ aatā

maiñ nafrat meñ adāvat meñ mohabbat ko milā luuñ kyā

kī barsoñ se to gin gin kar maiñ in ko ḳharch kartā huuñ

abhī bhī chand sāñseñ haiñ tirī ḳhātir bachā luuñ kyā

Leave a Comment