Aslam Rashid
mire qadmon men duniya ke ḳhazane hain uTha luun kya
zamana gir chuka jitna main ḳhud ko bhi gira luun kya
tira chehra banane ki jasarat kar raha huun main
lahu ankhon se utra hai to rangon men mila luun kya
suna hai aaj basti se musafir ban ke guzroge
agar niklo idhar se to main apna ghar saja luun kya
bhara ho dil hasad se to nazar kuchh bhi nahin aata
main nafrat men adavat men mohabbat ko mila luun kya
ki barson se to gin gin kar main in ko ḳharch karta huun
abhi bhi chand sansen hain tiri ḳhatir bacha luun kya
Leave a Reply