Yahan Dildar-Begam Dafn Hai

ek an-jana sa Dar

jab vo paida hui thi

us ke andar jazb tha

ek andheri kothari ka khauf

rag rag men basa tha

ek unchai se gir jaane ki dahshat

pichhe pichhe chal rahi thi

ek darvaze ke pichhe ja ke chhup jaane ka shauq

zindagi ki sab se pahli aarzu thi

khidkiyon ki ot se galiyon ka manzar dekhna

zindagi ki sab se pahli justuju thi

jab zara sa vaqt guzra

aql ke taron ki jumbish se badan jaaga

hifazat ka tasavvur is qadar vahshat-zada tha

ki apne jism se sharmindagi hoti rahi

phir kharidaron ki duniya men zara sun-gun hui

dil dhadakne ki sada madum ho kar rah gai

khauf ke gahne saja kar

aur jhijak ke be-tahasha phuul pahna kar

kharidaron ne us ko phir se andhi kothari men qaid kar Daala

vo jis ka khauf vo bachpan se sahti aa rahi thi

phir zara sa hosh aaya

daur-e-nau-umri gaya to aankh se parda hata

manzar nazar aane lage

paanv chaukhat ki taraf badhne lage

ik qadam rakkha hi tha ki nanhe nanhe haath ik zanjir ban kar aa gae

ab vo is raste men hai sab jis ko rah-e-marg kahte hain

munjamid ankhon men ab manzar thaharte hi nahin

ab kisi chaukhat ki janib paanv badhte hi nahin

nanhe nanhe haath kuchh is tarah unche ho gae

ab dastaras se duur hain

apni zanjiron men khud mahsur hain

us ki andhi kothari par ek katba nasb hai

”is jagah dildar-begam dafn hai

vo afifa parsa sabir-o-shakir so rahi hai

yahan se ghair mardon ka guzarna mana hai

barae fatiha jo aana chahe aae

lekin duur se padh le”

Leave a Comment