Aurang Zeb
ab koi aur musibat to na paali jaa.e
us ki yadon se bhi ab jaan chhuḌa li jaa.e
vo bhi mere liye kuchh sochta hai sochta huun
kaise dil se mire ye ḳham-ḳhayali jaa.e
ziist be-rabt hai par hai to ḳhuda ki ne.amat
jis tarah se bhi ye nibhti hai nibha li jaa.e
aise bhi dost hain kuchh jin ka yahi maqsad hai
vaar kya un ki koi baat na ḳhali jaa.e
yaad jis ki hamen sone nahin deti aksar
us sitamgar ki bhi ab niind chura li jaa.e
us ke dar se main yahi soch ke lauT aaya huun
‘zeb’ ab ke bhi na dastak miri ḳhali jaa.e
Leave a Reply