kyuun naseha udhar ko na munh kar ke soiye
dil to kahe hai saath hi dilbar ke soiye
ghabra ke us ka kahna vo haae shab-e-visal
bas bas zara ab aap to hat kar ke soiye
main aap se khafa huun ki tum ruthe ho pade
bohtan mere sar pe na yuun dhar ke soiye
sote men bhi jo dekhiye to chaunk hi uthe
kis tarah saath aise sitamgar ke soiye
tum lutf-e-nashsha dekho zara tum ko dekhen ham
kya lutf hai ki lete hi saghar ke soiye
mashhur hai ki suuli pe bhi niind aati hai
ya-rab shab-e-firaq men kyunkar ke soiye
takiya to aap sar ke tale roz rakhte hain
ab haath mere rakh ke tale sar ke soiye
vo muskura rahe ho lo vo aankh khul gai
yuun kaun manta hai ki jag kar ke soiye
pas-e-adu to dekho hamen hukm hai ‘nizam’
shab ko kahen na paas mire ghar ke soiye