Raste Mein Aa Rahe Hain Jo Nadi Nale Na Dekh

Tanweer Gauhar

raste men aa rahe hain jo nadi naale na dekh

manzilon ki chaah hai to paanv ke chhale na dekh

rah-e-haq par gamzan rah aur haq ki baat kar

kya sitam Dha.enge tujh par ye sitam vaale na dekh

himmat-e-mardan agar qaa.em hai to phir fikr kya

zulm ke sar ko kuchal de haq ke matvale na dekh

mere bhaa.i aadmi ki adamiyat ko parakh

muflis-o-nadar ya phir mal-o-zar vaale na dekh

husn-e-batin husn-e-zahir se baḌi shai hai na bhuul

rang hain donon ḳhuda ke gore aur kaale na dekh

ye hai tariḳhi imarat is ki azmat ko salam

gard aluda imarat men lage jaale na dekh

khul ja sim-sim khul ja sim-sim kab talak chilla.ega

tu ali-baba nahin hai toḌ de taale na dekh