Sarshar Siddiqui
sahra hi ghanimat hai, jo ghar jaoge logo
vo alam-e-vahshat hai ki mar jaoge logo
yadon ke ta.aqub men agar jaoge logo
meri hi tarah tum bhi bikhar jaoge logo
vo mauj-e-saba bhi ho to hoshyar hi rahna
sukhe hue patte ho bikhar jaoge logo
is ḳhaak pe mausam to guzarte hi rahe hain
mausam hi to ho tum bhi guzar jaoge logo
ujḌe hain ka.i shahar, to ye shahar basa hai
ye shahar bhi chhoḌa to kidhar jaoge logo
halat ne chehron pe bahut zulm kiye hain
a.ina agar dekha to Dar jaoge logo
is par na qadam rakhna ki ye rah-e-vafa hai
sarshar nahin ho, ki guzar jaoge logo
Leave a Reply