‘sayyad’ tumhare gham ki kisi ko ḳhabar nahin
ho bhi ḳhabar kisi ko to samjho ḳhabar nahin
maujud ho to kis liye mafqud ho ga.e
kin jangalon men ja ke base ho ḳhabar nahin
itni ḳhabar hai phuul se ḳhushbu juda hui
us ko kahin se DhunDh ke laao ḳhabar nahin
dil men ubal rahe hain vo tufan ki al-aman
chehre pe vo sukun hai maano ḳhabar nahin
dekho to har baghal men hai daftar daba hua
aḳhbar men jo chhapna chaho ḳhabar nahin
nok-e-zaban hain tum ko sharabon ke naam sab
lekin nashe ki bada-parasto ḳhabar nahin
kaghaz zamin-e-shor qalam shaḳh-e-be-samar
kis aarzu pe umr guzaro ḳhabar nahin
‘sayyad’ koi to ḳhvab bhi tasnif kijiye
har baar tum yahi na sunao ḳhabar nahin
Leave a Reply