Etibar Sajid
ye barson ka taalluq tod dena chahte hain ham
ab apne aap ko bhi chhod dena chahte hain ham
kisi dahliz par ankhon ke ye raushan diye rakh kar
zamir-e-subh ko jhinjhod dena chahte hain ham
jidhar ham ja rahe hain us taraf tuuta hua pul hai
ye bagen is se pahle mod dena chahte hain ham
ye naubat kal jo aani hai to sharminda nahin honge
marasim ehtiyatan tod dena chahte hain ham
ajab divangi hai jis ke ham saae men baithe hain
usi divar se sar phod dena chahte hain ham
taalluq kirchiyon ki shakl men bikhra to hai phir bhi
shikasta ainon ko jod dena chahte hain ham
Leave a Reply