dil ke dar par qufl paḌa hai tum bhi chup ho ham bhi chup
ḳhamoshi ab shart-e-vafa hai tum bhi chup ho ham bhi chup
be-sauti ab saut-o-sada hai tum bhi chup ho ham bhi chup
lafzon ka dam TuuT gaya hai tum bhi chup ho ham bhi chup
kal tak to jhankar salasil ki thi jiine ka paigham
aaj ye kaisa vaqt paḌa hai tum bhi chup ho ham bhi chup
gulshan gulshan sahra sahra kis ne phunka aisa fusun
ik ik taa.ir sang hua hai tum bhi chup ho ham bhi chup
dil se rishta TuuT gaya hai ab to zaban ka bhi ‘shibli’
is se baḌh kar koi saza hai tum bhi chup ho ham bhi chup
Leave a Reply