Shahid Kamal
ye zarurat hai to phir is ko zarurat se na dekh
apni chahat ko kisi aur ki chahat se na dekh
tujh men aur mujh men koi farq nahin hai lekin
tu sharafat ko miri apni sharafat se na dekh
mujh ko ho ja.egi ab mujh se hi nafrat varna
ai miri jaan mujhe itni mohabbat se na dekh
hans ke har bojh zamane ka uTha leta huun
main huun mazdur mujhe itni hiqarat se na dekh
ham-nashini ka sharaf sab ko kahan milta hai
tere pahlu men jo baiTha huun to hairat se na dekh
husn-bini ke bhi adab hua karte hain
us ke chehre ki taraf itni jasarat se na dekh
us se manga hai kahan main ne koi harf-e-qisas
mere qatil se ye kah mujh ko nadamat se na dekh
Leave a Reply