Wusat-E-Bahr-E-Ishq Kya Kahiye

vusat-e-bahr-e-ishq kya kahiye

ibtida ho to intiha kahiye

tere jaur-o-jafa ko kya kahiye

naaz kahiye unhen ada kahiye

us sitamgar ko or kya kahiye

saare jhuton ka peshva kahiye

puchhna chahiye tabibon se

dard-e-dil ki hai ye dava kahiye

ham bhi munh men zaban rakhte hain

kuchh samajh kar bura bhala kahiye

ghairon ke samne bula ke mujhe

kahte hain dil ka mudda.a kahiye

na koi yaar hai na hai gham-khvar

kis se ab dil ka majra kahiye

piite hain jo sharab masjid men

aise logon ko parsa kahiye

sharm kya hai mujhe jo kahna ho

samne sab ke barmala kahiye

vo jafa-gar falak sitamgar hai

kise achchha kise bura kahiye

ghair saath aap ke maze luten

ham uthaen jafaen kya kahiye

bhuul kar le gaya su-e-manzil

aise rahzan ko rahnuma kahiye

chaar agar yaar hain to das dushman

raaz dil ka na ja-ba-ja kahiye

jaan se gar gaya koi ashiq

ishq ki is ko ibtida kahiye

kya yahi shart hai mohabbat ki

be-vafaon ko ba-vafa kahiye

shaikh piite hain jo mai-e-ulfat

us ko kis tarah narava kahiye

dil ka siine ka aur jigar ka haal

hai ye vajib juda juda kahiye

haal sunte nahin mira na suno

apne dil ka to majra kahiye

‘mashriqi’ chhodiye buton ka zikr

subh uth kar khuda khuda kahiye

Leave a Comment