is rah-e-mohabbat men to azar mile hain
phulon ki tamanna thi magar ḳhaar mile hain
anmol jo insan tha vo kauḌi men bika hai
duniya ke ka.i aise bhi bazar mile hain
jis ne bhi mujhe dekha hai patthar se navaza
vo kaun hain phulon ke jinhen haar mile hain
malik ye diya aaj havaon se bachana
mausam hai ajab andhi ke asar mile hain
duniya men faqat ek zuleḳha hi nahin thi
har yusuf-e-sani ke ḳharidar mile hain
ab un ke na milne ki shikayat na gila hai
ham jab bhi mile ḳhud se to be-zar mile hain
‘nasir’ ye tamanna thi mohabbat se milenge
vo jab bhi mile bar-sar-e-paikar mile hain
Leave a Reply