Poet
pesh-e-ashiq chashm-e-giryan-o-lab-e-ḳhandan hai ek
jal gaya jo naḳhl us ko barq aur baran hai ek
dekhne deta nahin us ko hijab-e-ishq haa.e
huun main vo mahrum jis ko vasl aur hijran hai ek
na-tavani se tire bimar ke ruḳhsar par
saili-e-dast-e-sitam aur saya-e-mizhgan hai ek
pairahan men yuun badan hai jis tarah se tan men ruuh
chashm-e-bad duur ab latafat men vo jism-o-jan hai ek
maah se tashbih phir tujh ko na kyuun kar dijiye
chandni aur saaya tera ai mah-e-taban hai ek
aap se behtar ki aage ḳhud-numa.i hai zubun
ru-ba-ru-e-mehr mah-o-abr-e-be-baran hai ek
chahiye hans kar chhiḌakna ai lab-e-janan namak
atish-e-gham se kabab aur ye dil-e-sozan hai ek
ashiqon ke aage mushrik ai but-e-yakta huun main
gar kahun main husn men tu aur mah-e-kan.an hai ek
saikḌon tuti-zaban hain yaan asir-e-dam-e-gham
ḳhana-e-sayyad aur ye gumbad-e-gardan hai ek
ek hi ye nuur hai dil men har ik ke jalva-gar
shishe hain lakhon pari sab men vale pinhan hai ek
Leave a Reply